VIA DELLA SPIGA

Gh' è on òmm che el fadìga,
mattina bonora,
in Via de la Spiga...
con cura el lavora.

El nètta la strada,
tra bèj vas de fior,
el dà ona lavada
ai prèj, con amor.

L'è vèggia, l'è antiga,
'sta via de Milàn...
de colp, la te intrìga,
in del mond de doman.

I Nòmm pussée bèj
de la Moda hinn unìi...
se gh'è, incoeù, de mèj,
de quèll che gh'è, chì?

Na strja, sòtta 'l ciél,
vestìda de noeùv;
comètta de mél,
de lus che se moeùv...

La Spiga madùra
la s'ciòppa de gran,
la porta in del Mond
el nòmm de Milàn.

Vedrìnn, in filèra,
'me spècc, sberlusént:
gioièll che, de sera,
fann ricca la gent.

L'è semper in fèsta,
de nott e del dì.
La cambia la vésta,
la mètt el vestìi.

Giò de Cors Venèssia,
Mont Napoleon,
Gesù e poeù Sant Spirit,
la va in Via Manzon.

Tra Dolz e Gabbana,
Versace, Moschin,
gh'è Krizia, gh'è Armani
e gh'è el Valentìn,

Mattiolo, e poeù l'Hermes
gh'è Tiffany e Todd's...
S' te pàsset, tì, fèrmes!
Gh' hinn tanti bèj ròbb !

On pass adrée a l'alter:
on Re, te sarée...
Via Spiga: el teàter
de tutt i danée....

Claudio Grossi.
Dedicata ad una delle più famose vie di Milano e del Mondo.