EL BASELL

T' hee vorsùu fa' el basèll, per vèss mondial,
tì, col tò vizi de fà la Capital...
per vèss la prima in tutt quell che te fée
sacrificand l' amor, per i danée.

Te me l' hee fada grossa, ma de bon...
primma te ghe l' avevet coi teron,
perchè eren sporch, divers, fanigottoni,
senza rispett, rissos e lendenoni...

Dopo, quand te sée accorta del tò sbalj
t' hee fàa la marcia indrée... eren: fradèj !
Anzi, disèmel ciàr: " Faseva còmod
condì sù i operari , con trii ghèj... ".

Ma quand hinn andaa in piazza coj bandér,
terron e meneghin, inscì mis'ciàa,
a fa' i cunt di dirìtt e di dovér...
chi te comanda, l' ha cominciàa a tremà...

e gio' legnàd, per tutta la Via Larga...
e l'è stàa minga assée, te se regòrdet ?
Gh'è scappàa el mort... e gh'è s'cioppàa la grana...
anzi... on quajcòss de pùu... Piazza Fontana...

T' hee vorsùu fà el basèll per vèss mondial
e quand ghe pensi, mì, me senti mal,
Milàn sbattuda giò, Milàn in strada,
Milàn con el cùu biòtt, abandonada...

E tì, come ona mader snaturada,
te m' hee dàa anmò on' altra pugnalada:
te tiret i ultim dì del tò destìn
in mèzz a droga, lader e assassin.

Milàn che la gh'è pùu, Milàn che moeùr...
in man me resta el fidigh, minga el coeùr...
Milàn che la gh'è pùu, Milàn che moeùr...
in man me resta el FIDIGH, minga el COEUR.

Claudio Grossi.