E VA... CLONEMM...

Cossa vegnì chì a dìmm? Che certi Raelian,
fioeù de Adonài Elohim, guidàa da Asthar Shiràn,
gh'hann avuu l'intenzion de fecondà, e fà nàss,
con tant de clonazion, 'na pastrugnètta in fàss?

Inscì tutt i giornaj, radio e television,
hinn andàa lì, a filmaj, 'sti quatter gajoffon !?!
Bon de fotocopià l' esser umàn in séri,
fall crèss e trapiantà, segond el desidéri,

quell che ghe serv al primm: (l'originàl copiàa)
che 'l diventa : assassin, e on infernàl : " papà ".
De bén in mèj!... Bravissim! L'è on UFO, e on robottin,
(al post de Quell'Altissim) che hann dàa la Vitta, infìn?

Extraterrestri, che da on mond lontan,
hann inventàa, in la palta, on pian De. ..vin
in gir per l'Univers coj... damigiann
per fà l'Adàmm e l'Eva, e poeù, el ...Caìn.

Che l'ha spettaa nagòtt per fà el... fradèll...
e fracassàgh el coo a quell tal Abèl...
bej portator de noeùva Civiltà,
se véd benissim, el mond, come l'è andàa...

Claudio Grossi.

Ispirata da un articolo sul Corriere della Sera.