L' E' SEMPER PREST...

Hoo fàa on tocchèll de stràa, per 'sto paés;
giust quèll che l'è stàa assée, arént ai scés,
cont el pensér rivòlt a quèj che, jér,
passàven anca lor, per 'sti sentér.

L'è anmò tùtt come ai témp de tanti ann fa.
Istèss di mè regord: stèss mur, stèss cà;
e pròppi in faccia a mì, pròppi de front,
reconossi i montàgn e l'orizont.

De drée a ona curva strètta, sora i pràa,
se comincia a andà in sù. Indoe ghe sta,
tra i piant de làres, nètt, l'antìgh profìl
de la gésa de Torr, col campanìl.

A l' improvìs, scondùu da on vècc murètt,
quasi smorfios, séri, educàa, discrètt,
gh'è el loeùgh indoe riposa, tra la quiètt,
chi l'ha portàa de là tutt i segrètt:

l' òdi, el dolor, l'invidia, e i sò contés,
tutt quèll che l'è stàa vitta, in 'sto paés,
disperazion, ricchèzza e povertàa.
Tutt quattàa giò. Scondùu. Desmentegàa.

Ma me despiàs che, insèmma a 'sto témp làder,
la màder de la màder de mè pàder,
cont la soa cros de lègn, in dignitàa,
la sia finìda in niént. Tutt cancellàa.

Polver su polver. Quèst deventarèmm!
Tra rabbia e amor. Preghiér cont i bestèmm.
E quand avarèmm finìi, de fà frecàss,
ne ruzarànn, de prèssa, sòtta a on sàss...

Ma, intant che sèmm de chì, pensèmm al rèst,
a vèss cristiàn, minga domà per nòmm.
Che, per vèss séri, l'è stàa creàa, l' òmm.
Che, per andà de là, l'è sémper prèst...

Allora? Stèmm in gamba, tùcc insèmma.
Cantèmm, bevèmm, ballèmm in compagnìa!
Tra i nòst amis, restèmm, in alegrìa!
Ruzànd ai spàll el rèst. E inscì la sia.


Claudio Grossi.
Torre. Valle di Blenio
Canton Ticino - Svizzera

"La Gèsa de Torr, col campanil...".

La Chiesa di Torre, col campanile.

La foto è del 1930, e fa parte dell'Archivio Donetta. Fotografo Bleniese.

Gli accenti, anche se non dovuti, sono posti per una corretta lettura del milanese.

La " o " non accentata, si legge : "u".

Licenza poetica dell' Autore.