RINGRAZIAMENT DOVUU A ON AMIS DISINTERESSAA

Car el mè amìs, mi gh'hòo de ringraziàa,
per i cinq liber, che Lùu el m'ha prestàa,
e nel frattémp, ringràzij el bon vinée
che el m'ha permìss de conversà con Lée.

Oh, se el savèss che grand piasè gh'hòo avùu
nel fagh sentì 'sti pover quàtter rìmm,
quand me sentivi on Meneghin sperdùu,
in mèzz a tanc terroni e marocchin!

L'è stàa el Signor, che l'ha vorùu jutàmm,
e mètt el sò bon coeùr sul mè cammin.
Apos tanc lagrim, l'ha vorùu 'scoltàmm,
e presentàmm, dennànz, on: Meneghìn!

Va' che te va', on bèl dì, in quèll de Segràa,
inaspettatamént, come in on sògn,
giust appena finìi de lavorà,
la sort, la m'ha fornìi, di mè besògn.

Hoo trovaa on angiol, on fradèll, on òmm
che, in del légg tùcc i mè castronerìj,
el m'ha jutàa a scavà, sotta a quell Dòmm,
per imparà a scernì i me fantasìj

e fà in manèra de scriv pussée polìd
la léngua pura di mè busecchée,
ma senza provocà, chi légg, al rìd,
senza straccà, nè fà el sècca-bedée.

Hoo amàa tùcc i Poètta de Milàn,
hòo ritrovàa el cordon ombelicàl,
el Magg, el Porta el Balestréer el sànn
che el Gròss l'è mè antenàa fenomenal!

Donca, cont 'sti trii quart de Nobiltàa,
se permettì, me foo coragg, aspètta!
Se me fìi post, me pòdi comodà
e vègh l'onor de vèss ciamàa: Poètta.

Ma mì, chi son, che gh'hoo 'sto gran pensér,
inscì anormal, e tanc insuperbios,
sì de preténd de vèss, come fùss vér,
portàa de colp tra Vuu, Poètt Grandios?

Che mérit mì gh'hoo mai, rispètt ai alter
mortai, che hann fàa Poesia, primma de mì ?
Se non quèll de avègh on bon caràtter
e scernì, cont el coeùr, 'se gh'hoo de dì?

Gh'è niént che incoeù me fà divèrs de lor.
Per quèst mì son confus e inscì dubbios...
Se son Poètta o no, le sà el Signor.
Perciò :"Tirèmm innànz!". Cont quèsta cros.

Claudio Grossi.

Dedicata all' Amico Farina, di Segrate.
Gli accenti, anche se non dovuti, sono posti per una corretta lettura del milanese.
Licenza poetica dell'Autore.