PINKI

ON CINGHIAL DE TRENTA CHILI,
ANMO' VIV, IN DEL NAVILI,
L'HANN PESCAA SU', DI POMPIER.
'STA NOTIZIA, SUL CORRIER
CHE EMM LEGGIUU ON POO DE TEMP FA,
L'HA FAA EL GIR DE LA CITTA'.

Chi sa cossa gh'è saltàa
in del coo de 'sto cinghiàl ?
Forsi la curiosità
de vedè la Cattedral,
o l'istint, che el voeùr slargà
el possèss territorial ?

Cert che, mercoldì de sera,
on quajcòss l'avarà stremìi,
fatto sta che, in gran carriera,
l'ha vorùu 'rivà fin chì.

- Addio, bosch! Addio, bèj piant !
Addio, Parco del Tesìn !
Voo a fà on gìr, el mond l'è grand !
Voeùri andàgh adrée al destìn.

In via Lodovico el Moro
che, tra Corsich e Milàn,
quand i clàsson fann el còro,
gh'è el concerto del baccàn,

'sto cinghiàl el tròtta el tròtta,
i automobil a sfiorà,
l'è l'impàtt, la primma bòtta,
el salùt de la Città.

I auto sfreccen in la via;
l'acqua la divìd in dùu,
el terror, la frenesìa...
de coragg ghe n'è già pùu.

El se tùffa in del Navili,
e l'istint le fà noà.
El spalanca i sò pupill:
mulinèj, corrént giazzàa.

Se riprend con tutt i fòrz
el combàtt per no finì
giò in del fond, el sént la mòrt
già in di òss. L'è tutt stremìi.

Tutta nòtt in l'acqua scura,
tutta nòtt l'è adrée a sbragià.
Brutta sòrt, 'sta gran paura:
moeùri ! Moeùri ! Voo de là !!!

Pòer cinghiàl ! Pòer martorèll...
Va' che razza de aventùra...
Va' che razza de cervèll...
L'andà a fà ...villeggiatùra !

Meno mal che la mattina
on quajvun el t'ha sentìi...
da ona vèggia palazzina
el te véd on inquilìn...

"Pronto..., pàrlen i pompiér ?
Ciappèmm minga per on matt,
nel Navili, e quest l'è vér,
gh'è on cinghial che l'è drée a sbàtt,

per salvàss da la corrént!
Corrìi subit?... Per piasèe!
Che mì, intant, a ciàmi gént!
Mèj fà a svelta! Alé! Alé! ".

L'è rivàa el veterinari,
da via Darwin hinn rivàa,
per dò or, 'sto gibilléri,
tutt Milàn l'ha dessedàa.

On cinghiàl in del Navili !?!
Robba de giugàgh al Lott !
L'hann salvaa. L'hann ciamàa: PINKI.
L'ha passàa ona brutta nòtt.

Claudio Grossi.

Recitata davanti a Nannni Svampa, al corso di milanese, al Liceo Gonzaga di Milano.
Storia vera, messa in rima da me, tratta da un articolo del Corriere della Sera.
Gli accenti , anche se non dovuti, sono posti per una corretta lettura del milanese.
Licenza poetica dell 'Autore.