CHI SA ' ME TE SAREE

Chi sa 'me te sarée, Milàn, tra dusent ann ?

On super moster de cemént armàa,
cont i càa esagonàj, come alveàr.
Senza on tocchèll de vérd, on strasc de pràa
a dàtt l'ossigen, per fatt tirà el fiàa.

Chi sa come sarànn tùcc i tò fioeù?

In maschera antigas, in fila indiànna
per andà a scoeùla, in metropolitànna,
tùcc smort, rachìtich, che per fà on poo de sport.
ghe farànn vedè on càmp, domà in del dì di mòrt...

Te sarée vèggia e piènna de dolor ,
o pur resuscitàda, per amor ?

O la Natura l'avarà fàa el miracol
de frantumà el cemént cont el so' vérd
e tì, Milàn te sarée anmò on spettacol
de piant, de fior, de amor, de sentimént?

Chi sa, 'me te sarée, Milàn, t'el giùri,
che vorarìa, campà in salùd, finna a quèl dì,
per vèss presént , e podè fatt i augùri
de vìv anmò milla ann, insèmma a chi,

incoeù, el se sbatt, per minga fàtt crepà
tra i gas de scàregh che fànn i automòbil,
che el cerca a tùcc la solidarietà,
sien gént normàl, borghès, magùtt o nòbil.

Che el dis a tùcc de minga fàss fregà
da 'sto progrèss, che in nòmm de chissà che,
l'impedìss al cervèll de ragionà,
perchè, se pensomm, sèmm come andeghée.

Incoeù, sèmm tùcc consciàa de vèss tràa via,
illus de avèe 'quistàa l'immunitàa,
quell che ne dìsen spèss, l'è ona bosìa.
infàtt, chì, se rièss minga a respirà.

Ma, l'important, l'è che: gh'èmm i computer,
el cellulàr, la màchina, i danée,
i dònn rifàa de noeùv, i mas'c con l'uter,
el Grand Fradèll, la Borsa, i Banch ... Alé!

Basta che te sée dént on gabinètt,
te troeuven subit, via satellitar!
Te mànden a ranà per via Internèt,
se rendomm minga cunt che sèmm: schedàa.

Gh'èmm on cavall de corsa? El ciàmomm : BRONCO...
Come gh'èmm de ciamàll, vist che l'è... bols?
Perchè, in allenament, per saltà on tronco,
ghe voeùr la gru, dùu crick e trii autobùs.

La Dolly la me scriv che el voeùr clonàll,
che la voeùr fa on icrocio con i bèer,
che hinn stuff de vèss cuntàa. Campa cavàll...
vann a dormì e tirenn giò la clér.

Al post di bèj polmonn gh'èmm di bèj... PULLMAN,
i fior se véden dénter a Musòcch
per fà l'amor... le fèmm, però in notturna...
Nei temp supplementar, mèttom el rock.

Vitta de càn, vittàscia de galèra.
l'è matt chi viv inscì, matt de ligà.
L'è mèj crepà, che viv in 'sta manèra.
Basta dì : NO. L'è assée, per comincià.

Claudio Grossi

Gli accenti, anche se non dovuti, sono posti per una corretta pronuncia del milanese.
Licenza poetica dell'Autore.