ARIA DE NATAL

T'el védet, da l' aspètt che gh' ha la gént,
dai facc, che gh' hann i fioeù, visìn ai màmm,
quand guàrden i vedrìnn, bèj sbarlusént,
o i cartellon, sui cà, che fànn reclame.

Pàssen i tram, pian pian, sora i binàri.
Tra i macchin, i persònn, voeùrenn passà;
portand di bors e i pacch straordinari,
guarnìi de carta e nàster coloràa.

Cors Buenos Aires, Mont Napoleon,
Via de la Spiga, tutt illuminàa,
Gh'è la Gran Moda, che spettacolon !
Che gran piasè, 'sta fètta de Cittàa !

S' te pàsset in Sant Spirit, via Gesù,
gh'è ona filéra de alber de Natal:
tutta la via, la te dà el benvegnùu,
coi lampedìnn pizzàa. L'è ecezionàl !

In via Manzon, in sul canton de Armani,
gh'è on alberon che el par pién de regàj
che illumina i balcon cont i giràni,
bèj porton, di cà ricch, coi lor intàj.

In Piazza de la Scala e in Galleria
te séntet el savor de tùtt Milàn
quand, improvis, el Dòmm, su la tua via,
el te fà alzà el tò sguard, da boncristiàn.

Basta on pensér, on attim de preghiera,
per vèss in pas col mond e col Signor
per ringrazià la sort che, per davéra,
la t'ha fàa sto regàl, 'sto gran favor:

fàtt nàss e vìv in questa gran metropoli,
fàtt crèss insèmma a la modernità,
al fianch de 'sto progrèss, da Metanòpoli
al Pirellon: futùr anticipàa.

L'è l'aria del Natal, del panatton,
di cotolètt, de bon risòtt, de òss bus,
de busècca, nervìtt, luganegon,
de cornamùs, de cant a piènna vos,

de alber, de presèpi, de regàj
de augùri fàa col coeùr, de cartolìn,
del vedè per i strad on gran viavài
e del spénd on mùcc de tanti bèj quattrìn...

El ventisètt dicémber? Tutt finìi.
Se pensa al san Silvèster, a l'Ann noeùv ...
al gran veglion, a andàss a divertì.
Sèmm in bollètta? Fa niént. Anca se 'l pioeùv !

Siccome, adèss, gh'è gént de tutt el mond,
se sént parlà linguàgg de tucc i ràzz.
Milàn el cambia anmò. Pensi che, in fond,
nùmm meneghìn, dovarèmm uniformàss,

e rassegnàss, a fà de comprimàri
col noeùv padron, che èmm fàa vegnì in la cà,
l'aria de Ramadàn (digiùn a orari...)
ne abolirà: Natal e l' Hannukkà....

ClaudioGrossi.

Pubblicata su La Padania.
Grazie all'On. Matteo Salvini.
Gli accenti, anche se non dovuti, sono stati posti, per una corretta pronuncia del milanese. Licenza poetica dell'Autore.