MI VE CERCHI NO SCUSA

Mì, ve cerchi no scusa, perchè, i scus,
gh'hoo de avèghej mì, che, meneghìn,
son costrètt a 'scoltà, in moeùd confùs,
on baslòtt de scemàd, che, 'sto destìn,

me costrìng a sorbì, da pseudo attor,
che, istèss de tanti attor minga pagàa,
segùtten a sbraggià, con tant calor,
sora on palch scènich, mèzz desmentegàa.

Tanti porscèj settàa, sora di scràgn,
bèj sgonfi de lardàd, de grand leccàd,
che gh' hann l'autorità de vègh guadàgn
se stòppen, in sul nàss, i barricàd...

Rivoluzion, ghe voeùr ! Perchè se sa

che i gran poètta gh'hann l'abilità
de scriv paròll che se capìssen no,
che on bon vocabolari el pò spiegà,
ai tanc ignorantòtt, che sànn nagòtt.

E mì, me son stuffìi, de indormentàss,
ai tanti conferénz che fann, incoeù,
per presentà poètta de strapàzz,
che invìten al dormì, fin che se poeù...

Son stràcch de vèss guardàa compagn d'on màtt.
Che i "Grand" poètta gh'hann de sopportàmm.
Anca se gh'hoo on infàrt, e gh'hoo de sbàtt,
nissùn se toeù la briga de jutàmm...

Fà niént, nagòtt de dì. Mi son nissùn.
Ma se, la dignità, la vàr anmò,
cerchèmm, ve disi, se gh'è anmò on quajvun
che el pò insegnànn che rimma mèttom giò...

E quand avarèe trovàa chi l'è maèster,
on òmm de clàss, che el scriva di bèj ròbb,
cercand chì, in Patria, oppur cercand a l' èster,
sarìi anmò bon de fall diventà snob,

e de cercà de rompigh i ... balèster
tutt i momént, e de trovà occasion
de criticàll in pùblich, col capèster
de fàll passà: de pirla, tra i cojon ...

E mì, che, ormai, conossi già l'ambiént,
me guardi bèn da vojàlter. Leccapée !!!
Dij voster crìtegh, m' interèssa niént.
Avìi sbagliàa indirìzz. Rompa badée !!!

Se spettìi, al varco, on òmm, per mincionàll,
da grand vigliàcch, poetàster, copionàzz,
ve tiraroo giò mì, dal pedestàll...
di voster pajasciàd, m' importa on càzz !

Claudio Grossi.

Poètta, se nas... donca... stée a la larga.

Gli accenti, anche se non dovuti, sono posti per una corretta pronuncia del milanese.
Licenza poetica dell'Autore.