MEDIOLAN, MITTLAND, MEDIOLANUM, MIRAGN...MA EL SO NOMM PUSSEE BELL L'E' : MILAN

Su sto nomm, l'ha scrivuu tanta gent,
e, sul simbol ch'el gh'ha, anmò pussée.
Gh'è chi dis che el voeùr dì, certament,
Majalonna tosada de drée...

Mezzalanna sbiottada in vergògna...
de storièll n'hann cuntaa finna tròpp,
mi pensi che i Etrusch, da Bologna,
sien rivàa finna a chì, al gran galòpp...

Federaa coi Città de Toscana,
on quej Càpp l'ha pensaa de fondà,
sul modell de la rocca Trojana,
on villagg, che el podèss diventà

on esempi; ona gran capitàl
bonna de commercià e lavorà
mercanzij d'ogni sorta e metàll,
loeùgh sicùr, per la gent e i soldàa.

Mediolanum gh'hann dìi, ma i roman,
e Miràgn on quajvun l'ha ciamaa,
poeù Mittland on quaj crucch allemann;
poeù Myland, ma el sò nòmm el se sà:

l'è Milàn, Milanìn, Milanon,
semper prìmm, semper gràss, semper bèll
chì se intrippomm, coj tò buseccon
de cassoeùla, risòtt e vinèll,

de lugànegh, salsìzz, cotolètt,
de pan cald, moresìn, savorìi,
nun stèmm bén in 'sto loeùgh benedètt
in cà nostra ne pias digerì.

Tùcc i alter pajàsc forestée
che maltratten el noster Comùn
farìen bén a stà foeùra di pée:
"Stée a la larga dai noster fortùnn...".

Oh, Milàn, vegnùu grand in la grassa,
or e argént cont i gémm t'hann faa scùd...
el diventa nissùn chi te lassa:
chi te brascia l'è on scior in salùd...

Gh'è benèsser per tùcc i tò fioeù
basta avègh di brasc bon e cervèll...
come jér, se sa bén che, anca incoeù,
ne protéggen el Domm e el Castèll.

Progredì l'è el destìn che te gh'hee:
dal passaa al tò futur la toa màn
la lavora e la cunta i danée.
Mesteràsc... daneràsc... nel baccàn...

In la nèbbia, con tì, gh'èmm ripòss.
Sèmm nassùu Meneghìn Ambrosiàn.
Te ringraziom de coeùr per tuttcòss,
Nobilissim, bellissim: Milàn!

Claudio Grossi.

Pubblicata su El nost Paes
Pubblicata su Sciroeu de Milan
Recitata e registrata a Telelombardia
Recitata e registrata a Tele Padania
Recitata e registrata a Sette Gold