L' ULTIM PONT

Vitta de randa, vitta de galera.
Parlen de amor, i alter, quand vègn sera,
ma mì, che gh' hoo pùu donna, né danée,
me brasci, in de per mì, cont el pensée...

E l' ultim pont, che gh'è, su 'sto Navili,
l' è la mia cà, el post di mè bisbilli...
E la preghiera, che hoo imparàa de fioeù,
che hoo mai desmentegàa, la disi incoeù.

Madonna de La Rossa, damm a trà:
damm ona man a lavà giò i peccàa;
mì te regali on fior, Tì Mamma bònna,
Tì, dìghel, al tò Fioeù, che 'l me perdòna...

Hoo lassàa perd tuttcòss: famiglia e amis,
gh' hoo pùu parént; dal coeùr me son divis,
hoo cancellàa la storia e el mè passàa,
per conquistàmm 'sto stràsc de Libertàa.

Senza padron, responsabilitàa,
gh' hoo per compagn i càn de la cittàa.
Ma l' è mèj on càn bastard, a quàtter sciàmp,
che el pè d'on òmm che 'l te dà minga scamp...

Madonna de La Rossa, dàmm a trà:
l' è staa per liberamm, che l'hoo coppàa...
Mì ghe regali on fior... Tì, Mamma bònna,
Tì dìghel, al tò Fioeù, che 'l me perdòna...

Claudio Grossi.

Pubblicata sul libro edito per il Premio Poli
Associazione : El Ponteséll.
Milano.

Il disegno al computer : " Cavalli da tiro" è di Claudio Grossi.

Gli accenti, anche se non dovuti, sono posti per una corretta lettura del milanese.

Licenza poetica dell'Autore.