MANAMAN

Me piasaria, ogni tant, avègh el temp
per fà tutt quell che mì voraria fà.
Andà, a bighellonà, tra la mia gent,
in mezz a pagin vècc, de tanti ann fa.

Bighellonà, se intend, in ...Bibliotècca...
In compagnia di pussée bèj pensér,
scrivùu, in lenguagg de Meneghìn e Cècca,
da Gran Scrittor, Poetta, o Romanziér.

Sfojà pàgin su pàgin, con piasè,
e famm portà, dai Calendari, in viagg.
Accompagnaa, per man, per rivedè
'me l'era el nost Milàn. E fagh omàgg.

Da San Lorenz, la Védra, el San Gottard,
al Forn di Scansc, al Dòmm, San Bernardìn,
parland col Porta, el Maggi, in quel Lombard
che, ormai, l'è pùu de moda. E andà visin

ai nost montàgn, coronna de Milàn,
creaa per fà de scùd, come Gigànt
che se scambien, in tond, tegnùu per man,
l'eco di nost canzon ... de tant in tant.

Claudio Grossi.

Scelta e pubblicata sul Calendario dell' Associazione ex Martinitt
i migliori 12 pittori ed i migliori 12 poeti di Milano. Uno per mese.