COME ON CAMALEONT

Grazia, se te savèsset el piasè
che mi hoo provàa, quand t'hoo strengiùu la màn,
quand te m'hée dìi :"Adèss voeùri vedè
se te sée bon de decantà Milàn

a quèj che vègnen chì, in Piazzal Carrara,
a ricercà la vèggia tradizion
che voeùr i menestrèj, cont la ghitàra,
a regordà i Poètta, e i bèj canzon".

El Nino, el Mimmo, do'e hìnn andàa a finì ?
El témp el passa, ormai gh'è niént de fà,
Resta on quàj disco, on ritmo, on L.P.
on ritornèll, smarìi, in del témp che và...

'Na musica lontana, on' atmosféra;
forsi, el profùmm d'on fior, desmentegàa...
on vol de rondinèj, la Primavera,
basta on lenzoeù, stendùu, de sora on pràa...

Milàn, che l'era nòster, el gh'è pùu.
L' hà cambiàa pèll, come on camaleont,
adèss, l'è négher, giàld, turchés, indùu,
gh'hann portàa via i montàgn, e l'orizont.

Grazia, se te savèsset el magon
che me vègn, in de'l coeùr, a regordà
quand che nùmm preparavom i canzon
e serom chì, in Brioschina, a immaginà

de vèss i prìmm, de vèss i preferìi,
dal pubblich ambrosian, da la Cittàa,
a creà Poesia, de nòtt, del dì,
con Radio Meneghina a organizzà?

Grazia, col tò Sanson, con la toa Mary,
La Nora, el Lidio, el Nino, el Boi, el Barlètta,
el Carlo, el Cesarìn....che gibilléri !
Ognùn, con la sòa bèlla canzonètta

de regalà a la gént... Parlava el coeùr !
Te se ricòrdet ? Anca mì, con lor.
Visìn al Nino : capì còssa ghe voeùr,
per fà rivìv Milàn, col nòst Amor.

E vist che adèss, ormai, quasi nissùn
el cerca de riunì chi ghe voeùr bén,
me pàr sia rivàa el témp pussée oportùn
de scriv di noeùv canzon, nel ciel serén,

de arà 'sti camp, de ritrovà i radìs,
mèttes a lavorà, come convén,
per fà crèss tutt i frùtt del Paradìs,
seminànd Poesia, in 'sto terrén.

Tì, con la toa esperienza de la gént,
t'hèe 'scoltàa, in del tò coeùr, tutt i mè scrìtt;
e mì, a chi me voeùr bén, ghe cerchi niént.
E quèst l'è el mè regàl. L'è el tò dirìtt.

Claudio Grossi

Nota:" El Nino e el Mimmo" sono: Nino Rossi e Mimmo Di Mimiccoli.
Gli altri sono amici dell'Autore e personaggi della:
Brioschina ( Tipica Osteria di Milano, sul Naviglio ) dove si riunivano gli Autori e i cantanti meneghini, per creare, dal vivo, poesie e canzoni, e cantare le tradizionali canzoni milanesi.
Il locale sorge a 50 metri dalla casa dove è nato Claudio.

Gli accenti, anche se non dovuti, sono posti per una corretta lettura del milanese.
Licenza poetica dell'Autore.