CRISTOFORO COLOMBO 32

Giò del cavalcavia che gh'è a Sarònn,
da Varesina, in su la ferrovia ,
gh'era el mè zio, de cà, cont i sò dònn,
cioè: la mia cusìnna e la mia zia.

Quand s'eri on fioeù, ghe andavi, in bicicletta,
(in quàtter pedalàd, s'eri già lì),
e giò, in discesa, istèss d'ona saètta,
mì ghe rivàvi, quasi tutt i dì.

Perchè podévi sténdem, sora el vérd
d'on pràa a l'inglés, che el zio l'aveva fàa,
con tanti piànt e àlber sempervérd,
innànz a l'ort, semper bén coltivàa.

E me correva incontra anca el Gimìn,
on can fedél e dòcil 'me on agnèll,
con quèj che el conosséva, ma on ciappìn

con chi el cercava de passà el cancèll.

On càn de media tàja, cont 'na smàggia
négra, redònda, in del mèzz del sò pel gris,
che el ne paréva, quasi, on càn de caccia,
anca se, i passeròtt, eren sò amis...

Gh'era ona gatta grassa e poltronàscia,
mantegnuda a polmon e grass de 'ròst,
mèzza sorniònna cont ona boccàscia
bònna de ciappà i ràtt, ma de nascòst...

Gh'era ona tartaruga, la: Rebècca,
che la passava, a... svèlta, sotta i scés,
ma quand te la vedévet: gnècca gnècca,
la 'ndava a indormentàss, per ...vùndes més...

Cristoforo Colombo trentadùu,
Via Marco Polo, zòna di villètt,
in su ona strada granda, indoe, scondùu,
gh'era 'sto pòst, tranquìll e benedètt.

La mia seconda cà de gioventùu,
on bèll terràzz de 'nanz a la villètta,
che el dava in su ona stanza, bén tegnùu,
on corridor, 'na còmoda stanzètta ,

on gran salon, tinèll, con la cusina
on grand buffet, impienìi de ròbba bònna,
e me ricordi el ciar de la cantina
dove andavi a giugà con 'na birbònna...

On alber de Natal, finna al plafon,
con sù i usellìtt, fàa de metàll e piùmm,
nev in fibra de véder, col baston,
per pizzà i candilètt. Ah..., che profùmm !

Ricch de regàj, de bon ciccolatìnn,
de tutt i form, a imàgin de on nanètt,
on cavrioeù, on agnèll, on violìn,
e poeù ballon, biscòtt cont i amarètt,

salàm, giambon, scarpètt e lampedìnn
tùcc coloràa, tra carta de stagnoeùla,
nàster doràa, d'argént, e toronìnn,
ligàa a i ramètt del pìn, castègn, niscioeùla...

Cristoforo Colombo trentadùu....
S'te pénset ? Che me son desmentegàa
la voeùlta del morbìll, quand ghe l'hoo avùu?
La zia Liliana, quand la m'ha curàa?

Quand che gh'hoo avùu el paltò, cont el majon,
el treno militàr, quand s'eri on fioeù,

quand che vourévi bén, quand s'eri bon,
minga el cagnàsc che son, al dì d' incoeù?

I prìmm canzon sentùu quand gh'éra i fèst...
i amis de mia cusìnna : la Gabrièlla,
mì che cambiavi i dischi (l'era prèst
per ballà insèmma a lor) ...pòrca sidèlla !

I prìmm canzon d'America, i prìmm rock,
el cha cha cha, ma i Platters, el Paul Anka,
Pat Boone, el Neil Sedaka, tùcc in blòcch
eren di moster, col Presley in blusa bianca...

I Jeans, i ribattìn, i cinturon,
i teddy boys, James Dean, la sottogonna,
i cavèj cotonàa, hoola hop, television,
el frigo, la sescént, a voeùlt, la nonna...

La settimana bianca, i sci de lègn,
la Mondadori noeùva, i bèj scarpon,
el liber di ricòrd, cont i disègn
firmàa dai tò compagn, nel cassetton...

La Mina el Celentano, i urlator,
i brivid eren bleù, gh'era el Dallara,
el la Warm Morning in del mèzz del coridor..
Ghe pensi e la mia mént la se ris'ciàra.

Nùmm, come fior, cressùu in on temp gentil,
sèmm trovàa grand e gròss, quasi de bòtt.
Vànza on ciccìn de témp primaverìl,
ma gh'è già chì l'invèrna. L'è già nòtt.

Cristoforo Colombo trentadùu :
mì, te rivédi, come tanti ann fa.
Dal millanoeuvcentcinquantadùu.
Isola in del mè mar... Gh'è niént de fà.

Claudio Grossi

Ricordo della mia infanzia a Saronno.

Il disegno al computer è di Claudio Grossi.

Gli accenti, anche se non dovuti, sono posti per una corretta pronuncia del milanese.

Licenza poetica dell' Autore.