BOMBEY

El vècc Museo de Storia Natural
do'e sèmm andaa, de fioeù, coi noster mamm,
l'e semper lì. Cerchèmm de immaginall
nel primm Noeuvcent, quand gh'eren minga i tram,

ma i carrozz, coi brumista, e i cavalàsc
che poggiaven i zòccor sul selciàa,
tra l'odor de polìnna e de fojàsc,
mastegànd la pajàscia, in del spettàa

i client, che rivaven dai Giardin,
tra servòtt, e soldàa, e carabinér,
e omenon che, vestìi de meneghìn,
lavoraven, a or, 'me camerér.

Via Boschètt...Via Marina...Via Senàa...
'me l'è frèsch, 'sto canton di meravilli!
Via San Primm ... Sant Andrea ... in do'e gh'è stàa
el Pont de Cors Venèssia in sul Navili...

Via Palestro l'è el... vial di rimembranz ?
Me par che la sia inscì, se tanta gent,
incoeù, la cred, anmò, de vègh innanz
la Bombey...i pappagàj...tigher... serpent...

i focch con la giràffa e 'l giraffìn,
e soa Maestà el leon con la leonessa,
el leopard, e i ors e i cavrettin,
o la pantera, el loff con la ... " lovèssa "...

Ma chi se la regorda la gran gabbia
con l'aquila real?... e i scimpanzèe?
E quej scimmiètt, che se ciappàven rabbia,
saltand, sui quàtter man, innanz e indrée...

Quanti tocchèj de pan gh'ha dàa la gent!
E caramèj , niscioeù, tòcch de formagg...
Impieniven el gòzz ,come fuss nient,
vosàven, e ne faseven i boccàsc...

Giardin Zoologich: Cà de tùcc i fioeù...
De drée al Museo de Storia Natural...
Passàa el Domilla...pensa! Al dì d' incoeù,
in di Giardin, tra i piant, che hinn in sul Vial,

stravaccàa su i banchètt, hinn lì a spettà
che riven i student sora i basèj,
per dagh l'assalt, e vourè fagh comprà,
a 'sti tosànn e fioeù, di cadenèj...

L'Africa la gh'è anmò, ma i animaj
i hann sloggiàa tùcc ( e forsi l'è stàa on mal)
che n'è rivaa di alter...'me canàj!
Istèss di càn che...sporchen tutt i vial...

A propòsit de bèsti, gh'è pùu el Zoo.
Damm a trà a mì, Milàn: te gh'hee pùu scamp!
Al pegg, a gh'è mai fin... Attént, perciò
se, al post de quàtter, gh'hann domà dò sciàmp...

Claudio Grossi.

Il pappagallo Ara e il Leone sono stati realizzati al computer da Claudio Grossi.

Nota : "lovèssa" è la Lupa, dètta: lòa, oppure: lòva

Gli accenti, anche se non dovuti, sono posti per una corretta lettura del milanese.

Licenza poetica dell'Autore.