TREDESIN DE MARZ

.
Mì son nassùu in del Trèdes de quèll Màrz
quand in Italia gh'era ancamò el Re.
L'ultima primavéra senza sfàrz
che el Re de Màgg l'è andàa foeùra di pée...

Subit dopo la Guèrra, nassùu in cà.
Primmgènit mas'c, primm mì, de dò sorèll.
Rivàa come on regàl de Libertàa.
Gràcil, ma sàn 'me on pèss, vìscor e snèll.

Al Vintitrìi che gh'è in Piazza Carrara.
Cressùu adoràa, istèss de tanti fioeù,
da nonno e nonna e zii. In la cagnàra
che fa chi se voeùr bén. Istèss d'incoeù.

Profùmm... de biscottin, de cicolàtt...
de the e cafè, de grappa e de tabàcch,
de Kùmmel, Maraschìn, Marsàla, e piàtt
de porcellànna finna... e pàcch... e sàcch...

Savor de pasta fresca, fàda in cà...
de pién, inconfondibil, di ravioeù...
de tovàj bianch stendùu, bèj profumàa,
de ròst coj scigollètt... puré... brasoeù'...

Domèniga: balon, giugàa su on pràa...
i scarp de fòlball, coj biroeù de sòtt,
massàgg ai gamb, con l'oli canforàa,
acqua fresca e limon... in on baslòtt...

E sudor... e majétt... e calzetton...
e color... che te rèsten in la mént...
istèss del ritornèll d'ona canzon
che t'ha fàa inamorà perdutamént.

La canzon de la Vitta,
in sul spartìi,
che 'l t'ha fàa nàss,
e crèss, e amà,
dannà e sparì.

Claudio Grossi.

Pubblicata su El Sciroeu di Poetta nel 2002
13 marzo 1946. Mia data di nascita.

Gli accenti, anche se non dovuti, sono posti per una corretta lettura del milanese.
licenza poetica dell'Autore.