SARONN

Andavi a l'Oratòri. S'eri on fioeù.
De fianch al Santuari de Sarònn,
me le ricordi come fuss incoeù,
pròppi sul Vial, passàven i persònn.

Gh'era ona fontanella, d'acqua frèsca,
che la m'ha dissetàa, tant de quij vòlt...
bèj piant de plàten, l'aria pittorèsca,
i rondin, a fà milla giravòlt.

On témp sicùr, on témp de libertàa
con tanti amis visìn, compàgn de scoeùla,
per giugà insèmma, per bighellonà
e fà i bindon, in bici, a la Giroeùla.

Per anda' a pé, al vècc Mercàa Boàri,
o per giugà al balon, a l'Oratòri.
Visìn gh'era el cordée, col necessari,
per fà sù i còrd , con mòt circolatòri.

Vèggia Sarònn ! Col Vial di Rimembranz,
La Fabbrica visìn a la Stazion,
quella di tò Amarètt cont i fragranz
e i profùmm de Biscòtt del Lazzaron !

Scoeùla de cànt, per fà on' esibizion
domà con la mia vos, scondùu de drée
d'ona quinta in teater, on tendon.
Hoo dì che s'eri mi. Ma chi ghe créd?

Fa nient. In procession, hoo fàa el Paggètt,
vestìi de bianch, a i pée de la Madonna.
Al Palio s'eri el fioeù d'on cèrt Pedrètt
ingenoggiàa sul Càrr : che figurònna !

Hoo fà el Sagg de ginnastica in Collég
(quell Arcivescovil del Seminari)
e tra i clavètt e i compitt de corrégg
imparavi el Latìn sul dizionari.

Son mai sta bon de amà la matematica,
l'algebra l'era pròppi on gran matton.
Però in letteratura, in la gramàtica,
in metrica, coi rìmm... s'eri on campion !

E quanti poesìj hoo scrivùu per gioeùgh
scherzand coi professor, per rid on poo
parodiand i Poètta del caploeùgh
istèss d'on Meneghìn foeùra de coo !

Quanti canzon sonàa con la mia armonica
e la ghitàra per accompagnà
i proeùv d'ona seràda radiofonica
per vèss on cantautor, vèss acclamàa !

Hoo conservàa 'sti scritt, nel mè cassètt.
E quand gh'hoo temp, me pias andà a guardà,
e ricordàmm de quand s'eri on fiolètt
e pensavi soltant a andà a giugà.

Andavi a l'Oratori, s'eri on fioeù.
De fianch al Santuari de Sarònn.
Me le ricordi come fuss incoeù.
Adèss... sincerament, me par on Sògn.

Claudio Grossi.

Recitata a Tele Padania
Trasmissione Muse Padane.(puntata dedicata a me)
Conduttore il Prof. Andrea Rognoni
Direttore di Arte Nord.
Gli accenti, anche se non dovuti, sono posti per una corretta lettura del milanese.
Licenza poetica dell'Autore.