LA VEGGIA CIMA NORMA

Da ona finestra d'ona cà de Dang
Do'e gh'è la Posta sotta on bèll terrazz,
Se pò vedè ancamò e, forse, rimpiàng...
Archeologia Industrial. L'è on grand palàzz.

Ciamàll : "Palàzz", l'è quasi ona bosìa,
in veritàa, se pò denominàll
on rùder imponént, fàa in su la via,
che va vèrs Olivon, chì, in de la Vall.

La vèggia CIMA NORMA che gh'è a Torr,
l'è el simbol d'on benèsser che el gh'è pùu.
El ben, che on dì l'ha fàa, le sa el Signor,
tanto l'è el temp che l'hann saràda sù.

A pieno ritmo del sò lavorà
la vitta la passava in sicurezza
tra CICOLATT e pan de fà' bastà :
l'amàr mis'ciàa ai fregùj de la dolcèzza.

Mì senti anmò el savor de quèj... soufflage
chi l'ha provaa, el pò no desmentegà,
impienìi de bontàa, col gran vantàgg
de mangiànn 'na donzènna e mai stà màa...

Ah, che bèj temp, podè tornàa al passàa !
Me piasaria vedè tutta la gént
che l'è stada, de colp, lassàda a cà,
tornà lì a lavorà. Come fuss niént.

Ma el témp d'incoeù l'è on témp avàr e dur
gh'è pùu l'amor, el bén, la caritàa.
Intorna a i nòster coeùr èmm fàa sù i mur
e dèrvomm mai la porta a la pietàa.

L'ariditàa de tutt i sentimént
l'ha fàa el progress basàa sora i danée.
Politica aziendàl. Quèj che gh' hann niént,
vàrenn nagòtt. Sbattùu foeùra di pee.

Ah, CIMA NORMA ! Sù, vesìn al tècc,
gh'è on gran bèll stèmma, dént i ragg del So...
Ghe l' hoo in di oeùcc. Ghe l' hann anca quéj vècc
che vègnen finna a chì. Scorlénd el coo.

Claudio Grossi.
Torre. Val di Blenio
Canton Ticino.
Svizzera

L' immagine della Fabbrica di Cioccolato

"CIMA NORMA" è tratta dall'Archivio Donetta.

Fotografo Beniese. Risale al decennio 1920-1930 circa.

Gli accenti, anche se non dovuti, sono posti per una corretta lettura del milanese.

Licenza poetica dell'Autore.