CORS VENEZIA 32

Savìi che gh'è on Palàzz cont i Colònn
pròppi tra via Palestro e Serbellon
che, giust in Cors Venezia, el se despònn
ornaa de fenicòtter e pavonn?

Se andìi in via Cossa e in via di Cappuccinn,
fasend finta de nient, coi voster fioeù,
trovarì el Paradìs in on Giardìn,
come el se troeùva minga, al dì d' incoeù.

La Ca' de l'Invernizzi; el Scior che 'l gh'ha,
a Melz, 'na Villa antiga, del Sett'cent.
Con tant de cervi e daini, in libertaa;
che, quand t'je védet, fann el coeùr content.

Mì, che conossi el noster Grand Milàn
de drée ai facciàd de tanti bèj palàzz,
ve dìsi ciaramént, da popolàn :
- Fév no imbrojà dai coo de remolàzz !

Andée a cercà i bellèzz de 'sta Cittàa.
Fidèvess giust de chi, 'sti ròbb, je sà.
E, se 'l pò vèss de esempi straordinari,
v' èmm scrivùu l'indirìzz su 'l Calendàri.

Claudio Grossi

03. 05. 2003. Scritta e pubblicata sul Calendario degli Ex Martinìtt .