LA VACCA MATTA

La vàcca che gh'hoo mì, la fà pòcch làtt
la stà pù in pè, la gh'hà on fà de distràtt,
se l'è malàda o no, le sa el Signor.
Ciàmi el veterinari : on Gran Dottor.

Lée l'è settàda giò, in del mèzz del pràa.
Chi sa el perchè ? La voeùr minga magnà!
La guarda l'erba e la scorlìss el coo...
la cerca i quadrifoeùj ?...Adèss, se foo ?

La ciàppa la rincorsa e poeù: la salta
e la se sbàtt, de s'cènna, in de la palta!
La guarda i nivolètt, la voeùr volà...
la sfoeùja i margarìtt. Soo pùu 'se fà.

Gh'hoo presentàa on bel tòr, per fagh la... gionta.
Lée, l'ha nanca guardàa. Quand la se imponta ...
Par che la gh'abbia voeùja de parlàmm;
la sbàssa i oeùcc, la cerca de evitàmm...

Oh vàcca...stagh attént che l'ha mangiàa
on quajcòss che el podarìss avègh fàa màa ?
Va bén che quella voeùlta, in de la stalla,
con la morosa, inscì, per pastrugnàlla...

Oh vàcca... sora el fén... pò dàss... pò vèss
che dòpo, in del portàghel ... sì. De sbièss...
In de la prèssa... magàri ...mèzz svestìi
Che confusion...però... voeùri capì.

Oh vàcca... i mè calzètt...la canottiéra ....
in mèzz al fén... al scùr... vegnìva séra...
Ma me rigòrdi no.... se i ha magnàa ?
La gh'avarà minga el coeùr inamoràa?

Ohéi, vàcca bòja, còssa t' è vegnùu ?
Ecco spiegàa el perchè, quand t'hoo mongiùu,
per fànn, del latt, crescénza o la robioeùla,
se sént domà el savor... de gorgonzoeùla !!!

Claudio Grossi.

Pubblicata su El nost Paes

Il disegno al computer è di Claudio Grossi.

Gli accenti, anche se non dovuti, sono posti per una corretta lettura del milanese.

Licenza poetica dell'Autore.