PENSA, VESS SINDICH...

Pensa, a vèss Sindich, come el sarìss bèll !
Te ne farìsset rìd a crèppa-pèll,
con tanti gioeùgh de fà, per tùtt Milàn,
tra saltinbànch, pajàsc e battimàn ?

Fà scorpasciàd per tutt i dì de l' ann,
busècca e poeù risòtt cont el saffràn,
pollàster, salzizzòtt, luganegon,
polpètt, cassoeùla, e lìter de vin bon !

O pùr ghe sarìa el ris'c de peggiorà
tutt quèll che gh' èmm avùu in del nòst passàa ?
Vist che, in intelligenza, a tanta gént,
a pòcch a pòcch, ghe s'è annullàa el quoziént ?

A dagh el voto a quèj sèdes ann,
a tutt i forestée vegnùu a Milàn,
ghe ne voeùr fìdigh ! Ghe ne voeùr coràgg !
Vota l'Asilo... se gh' è di vantàgg ?

Ma poeù, quand passa i dì de la cuccàgna
se podarìss fà el cunt cont la Padania,
e se l' Umberto, el Silvio, dìsen : " NO."
insèmma al Fini, pòver Dario Fo...

Nobel o sèrv ? De cèrt : cont el sangh bloeù.
Contadinàsc ? Poeù vèss. Ma, al dì d' incoeù,
gh' è minga de fidàss. Perchè se ved
che pàren Nobel quèj che no se crèd.

Sèmm vegnùu a fàtt omàgg per tanti dì.
Tì, te ghe séret mai. Se pò capì.
Ma, sacranon ! Cossa te costa mai
ricév la gént, cognòssej, e 'scoltàij ?

Davéra, te sée mèj de certa gent
che la vàr pòcch, disèmm, che la vàr: niént.
Ma da quèst a vèss Sìndich, gh' è de corr.
Dai, lassa pèrd. Perchè, se no, hinn ... dolor.

Claudio Grossi.

Il disegno al computer : " il Clown toreador " è di Claudio grossi.