MILAN SE MOEUV

Piènna la Lùna, a carezzà, in la nòtt,
Dunn del Sahara, Vall del Nil, la Sfing...
I Faraon antigh, coi Sacerdott
de Amon, Horus e Ra. Anubi el sping

in alt: vers Sirio, el mus, gùzz, de sciacàll,
cercand Osiri, e Nut e Geb, i amant,
el profil d'Isid, languid e sensual,
sotta i Piramid. Dormen i Gigant...

Ninive e Babilonia, Tigri e Eufràa,
Baalbech, Harran e Ur, Paddàn Aràm,
dormen, i prèj glorios, desmentegàa,
in riva ai sacri fiumm "Mesopotàmm".

Da Gran Damasch, sui pist carovanier,
tra séda e or, e argent, mirra e l'incens
Tyro e Sidon, de frust, cadènn,' me jèr,
vèrs Ugarit, pòrten di eco inténs...

Gérich e Hébron, Bethlehèm, Nazarèth,
Jerusalèm, de David e d'Abràmm,
hann conservàa el pensée. Tegnùu, el segrèt
di Scrittur di Profètta, ai fioeù de Adàmm.

El rèst del mond l'è fioeù de tanta Storia.
Tanti Cittàa e Nazion s'hinn no movùu.
Come onda de mar che monta in Gloria
e poeù, in on attim, te la védet pùu...

Passàa... Presént... Futùr anticipàa!
Chi mai pò avègh 'sto merit de progrèss?
Questa, ve giuri, l'è la mia Cittàa.
Che la se fèrma mai... La corr... La crèss.

Tra taxi e tram e metropolitànn,
Gamba de lègn, l'è, ormai, in di vècc regord.
Da Supercapital, se moeùv, Milàn:
Linàa, Malpensa, i treni de la Nord.

Perpétov moviment di meravilli...
che inventa, semper, on quajcòss de noeùv.
Màsna, el molin simbòlich, sul Navili,
farinna del nòst sacch. Milàn se moeùv !

E la moeùv primma i man, per lavorà.
E, in man, la mètt el coeùr, primariament.
La nàss, dal coeùr, la solidarietà.
La va in del mond. Brasciand tutta la Gent.

Claudio Grossi.

Premiata dall' Associazione ex Martinitt per il concorso:
MILAN CHE LA SE MOEUV
patrocinato dalla Regione Lombardia
dal Comune di Milano
dall' ATM Azienda Trasporti Milanesi

Il disegno al computer è di Claudio Grossi.

Nota: *Mesopotàmm, è licenza poetica dell' Autore per "Mesopotàmich".

Gli accenti, anche se non dovuti, sono posti per una corretta lettura del milanese.

Licenza poetica dell'Autore.