NEL LIBER PUSSEE ANTIGH

Nel liber pussée antigh che gh'è a 'sto mond
me son fermàa sora on' ammonizion.
L'è inutil cinquantàlla ... andèmm a fond.
Quand che el Signor l'ha dìi:- Dèmm attenzion.

Quand te sarée entraa, dénter Canaàn,
te dévet no provà la compassion...
FAI FOEURA TUCC! Vècc, giovin, animàa,
dònn, ròbb che gh'hann valor, ìdol, istrion.

Quell che ve disi, l'è per favv del bén.
Perchè mi soo giamò quell che succed.
Attént, perchè soo quell che ve convién.
Se fii de voster coo, paghì merzéd.

Mèj subit, che domàn. Sù, dèmm a trà:
mèj liberàss da tutt 'sta baraonda...
Perchè, se vorì avè la Libertàa,
no vègna, on Beduìn, che ve sconfonda.

Inscì, dìs el Signor, el Dio de Abràmm,
el Creator de tutt quell che vedì.
E se, a on quajvun, ghe vén de contestàmm,
portèmmel chì... Che, poeù: GHE PENSI MI.

Perchè quand penserànn de vegnì in ciel
istèss di martir, impienii de bomb,
saltand per ari contra l' infedél,
stée pur sicùr : impienirànn i tomb.

L'òmm, l'è de polver. Polver, el dév vèss.
E chi el se màzza, o 'l màzza l'altra gent,
gh'ha no de prèmi. E, anch se me rincrèss,
gh'ha no : Resurrezion. Finìss in nient.

Cròdenn i Torr... aerei: giò, a s'cioppon...
Fioeù, vann in guèrra, con la ciàv al còll.
Tùcc i Pastor, de tutt i religion,
VEDEN EL VER, MA SCONDEN I PAROLL ...

Ognùn trà la soa acqua in do'e el voeùr...
Fin quand fànn i danée, tègnen el pòst.
Fa nient, se véden che la gent la moeùr,
basta sìen no de lor. Mullàh o prevòst...

Fin quand ghe sarà pégor de tosà
l'è fàcil fà el Pastor de tutt i razz...
Vegnì in de mì... quel Dio che el v'ha creàa,
ràzza de fàls 'me Giùda de strapàzz...

Che ve mettaròo a pòst, col lanternìn,
in del letàmm, tra i làder e i assassin.

Claudio Grossi


Recitata e registrata a Sette Gold
trasmissione : El to' dialett
di Roberto Villani.

Il disegno al computer è di Claudio Grossi.